Energia

Home/Pusiziuns/Energia

La meglra energia è quella … spargnada. Il potenzial da respargn è enorm ed igl è ura e temp che la politica sa fatschenta seriusamain cun quest tema. E lura: Il futur tutga a las energias renovablas, nizzegiadas da maniera cumpatibla cun la natira e cun la cuntrada.

Jau sustegn uschia la „Strategia 2050“ dal Cussegl federal che vul reducir era il consum da l’energia fossila cun las emissiuns dal CO2, nuschaivlas per il clima. E l’abandun regulà da l’energia nucleara s’impona, perquai ch’ils ristgs èn memia gronds, perquai ch’ella producescha ruments radioactivs che nagin vul e perquai ch’ella custa memia bler. En la proxima legislatura decida il parlament da quai. Jau m’engasch cun persvasiun per in provediment d’energia ecologic che promova las energias indigenas e plazzas da lavur en la regiun.

In Svizra, en in pajais cun ina auta densitad da populaziun, posseda cunzunt l’energia solara in grond potenzial da svilup.

Intgins puncts da vista

Ins sto midar las leschas per la protecziun da la natira per pudair promover senza impediments las energias renovablas?

Las leschas per la protecziun da la natira preservan nossa basa da viver, nossa qualitad da vita. En tge mund vulainsa viver e tge porschainsa als turists che alimenteschan l’economia grischuna sch’ils ultims auals e flums n’han betg pli aua e sche las pli bellas cuntradas alpinas s’empleneschan cun infrastructuras per la producziun d’energia? In svilup raschunaivel da l’energia renovabla respecta las leschas per la protecziun da la natira. La Greina e l’aua restanta na vegnan betg tutgadas!

E las ovras d’energia a gas ed a charvun?

Las tecnologias alternativas, sviluppadas dad interpresas seriusas, èn prontas da pli daditg e sa perfecziuneschan di per di empermettend fatschentas avantagiusas. Uss ins duai sustegnair la realisaziun da projects innovativs e la politica sto promover quest svilup. Prendain davent il viertgel per l’alimentaziun en la rait electrica (KEV)!

Las energias fossilas ston esser obligadas da surpigliar ils donns da l’ambient (CO2) e vegnir pli charas. Il pievel grischun ha mussà ina lunga vesida cun refusar en il 2013 e 2015 ovras da cotgla a l’exteriur.

Il provediment d’energias renovablas n’è betg mo ina visiun: Las grondas citads svizras sa muventan gia en questa direcziun ed entaifer il 2035, premess la voluntad politica, pudess quai daventar realitad.

Avain nus in avegnir avunda energia?

L’effizienza energetica (gronds potenzials da respargn), l’aua (gia oz cuvra l’aua 55% dals basegns), il sulegl(pudess cuvrir 20% dals basegns), il vent, la biomassa, il biogas, l’energia geotermica, ils implants termo-energetics (Wärmekraftkopplung): plirs scenaris, tranter quels era in dal Cussegl federal, mussan ch’igl è pussaivel dad avair in avegnir avunda energia.

Ins na sto betg pli far attenziun dal clima?

La sminuziun accelerada dals glatschers – in trist signal dal stgaudament dal clima – pertutga nus fitg ferm. Sche nus na reducin betg las emissiuns dal CO2 vegn a capitar quai ch’il ex-schefeconom da la banca mundiala Nicholas Stern ha scrit fingià il 2006 en il rapport per la regenza britannica: La midada dal clima vegn a provocar la pli gronda recessiun ch’il mund n’ha anc mai passentà. Ed era la Svizra na vegn a vegnir schanegiada da questa. La sfida è fitg gronda pertge ch’ella è globala. Perquai tgi che na s’engascha betg per propi, na po betg spetgar ch’ils auters ageschan.