Passiuns

Home/Tgi sun jau/Passiuns

Jau ma legrel da pudair star en la natira. Gia sco uffant hai jau emprendì dad amar e respectar ella. Bleras da mias activitads politicas ed en uffizis d’onur ma pussibiliteschan in contact intensiv cun la natira.

Dapi che jau sun presidenta da Pro Natura (Svizra), scuvrel jau las bellezzas da la natira en l’entira Svizra.

La natira, observar la selvaschina, spassegiadas en las muntognas, turas cun il velo o la lavur en il iert èn per mai in motiv per buna luna.

Jau dovrel dentant era la musica e litteratura per ina vita armonica.

Dapi 25 onns – mintgatant pli intensiv e lura era pli pac – suond jau ils fastizs dal architect e patriot Giovanni Sottovia (1827-1892) da Vicenza. El ha marcà pli che ina vischnanca en il Grischun dal Sid.

Ils palazis a Poschiavo dattan perditga da sias capacitads architectonicas ed urbanisticas extraordinarias.

Sco istoricra passent jau bleras uras en archivs e bibliotecas. Perscrutar en il passà gida da chapir il preschent e dat ideas per il avegnir.

Mia passiun è l’istorgia regiunala tenor la devisa dal scriptur ed istoricher social svedais Sven Lindquist ‘Chava, nua ti stas’. L’istorgia da las regiuns da muntogna tradescha destins impressiunants, uschia era quels dals emigrants da mia val, tranter quests era da quels da mia famiglia.

Tranter mias passiuns sa chatta era la politica. Jau hai entschet baud da ma fatschentar en mia vallada natala cun natira e cuntrada, cun dumondas socialas, cun las perspectivas da svilup da las regiuns da muntogna. Era sche da l’autra vart sa chattava ina ferma opposiziun, cun mes cumpogns e mias cumpognas hai jau pudì festegiar bels success, sco en il 1983 cun l’acceptaziun da l’iniziativa Millemorti encunter la speculaziun da construcziun turistica a Poschiavo u en il 2013 il na dal pievel encunter gieus olimpics d’enviern gigantics en il Grischun.